प्रलेसको ७५औँ स्थापना दिवस सम्पन्न, हीरक वर्ष महोत्सव घोषणा

काठमाडौँ  / वि. सं. २०८३ साल आश्विन ५ गते 

प्रगतिशील लेखक सङ्घ (प्रलेस), नेपालले आफ्नो ७५औँ स्थापना दिवस भव्य रूपमा मनाएको छ ।

काठमाडौँको बागबजारस्थित हार्दिक होटलमा आयोजित विशेष कार्यक्रमका बीच सङ्घले स्थापना दिवस सम्पन्न गर्नुका साथै आफ्नो हीरक वर्ष महोत्सव समेत घोषणा गरेको छ । कार्यक्रमलाई सम्बोधन गर्दै प्रमुख अतिथि एवं चीनका लागि पूर्व राजदूत डा. कृष्णप्रसाद ओलीले वर्तमान सूचना तथा प्रविधिको युगमा प्रगतिशील स्रष्टाहरूले आफूलाई नयाँ ढङ्गले परिमार्जित गर्दै लैजानुपर्नेमा जोड दिए । उनले कृत्रिम बुद्धिमत्ता (एआई) बाट भाग्ने नभई त्यसलाई प्रगतिशील लेखन र साहित्यको हित अनुकूल प्रयोग गर्नुपर्ने धारणा राखे ।

नेपालका कम्युनिस्ट पार्टीहरू विभिन्न विभाजन र पुनर्गठनको अवस्थाबाट गुज्रिरहेको भए पनि प्रगतिशील लेखक सङ्घ विभिन्न सांस्कृतिक मोर्चाहरूको साझा संस्थाका रूपमा अगाडि बढ्न सक्नु गौरवको विषय भएको उनले बताए । प्रलेसलाई लेखन तथा साहित्यको क्षेत्रमा राष्ट्रिय रूपमा मात्र नभई अन्तर्राष्ट्रिय स्तरमै सशक्त रूपमा अगाडि बढाउनुपर्नेमा उनको जोड थियो ।

विशेषाङ्क विमोचन र हीरक वर्षको रूपरेखा

प्रलेसका केन्द्रीय पदाधिकारीहरूको बैठकले निर्णय गरेबमोजिम यस ७५ औँ स्थापना दिवस तथा हीरक वर्ष प्रारम्भको अवसरमा वर्षभरि गरिने कार्यक्रमहरूको प्रारूप तय गरिएको छ । सोही अवसरमा प्रगतिशील लेखक सङ्घको ३२औँ विशेषाङ्क समेत विमोचन गरिएको थियो ।

सङ्घका अध्यक्ष डा. देवी दुलाल क्षेत्रीको अध्यक्षतामा सम्पन्न उक्त कार्यक्रममा उनले संस्थाको हीरक वर्ष महोत्सवको औपचारिक घोषणा गरेका थिए । सांस्कृतिक मोर्चाका नेताहरू र स्रष्टाहरूको ऐक्यबद्धतासङ्घका महासचिव डा. पारस ढकाल (झागेन्द्रराज) द्वारा सञ्चालन गरिएको उक्त कार्यक्रममा उपाध्यक्ष समीर सिंहले स्वागत मन्तव्य राखेका थिए ।

कार्यक्रममा शुभकामना मन्तव्य पूर्व मन्त्री तथा प्रलेसकी सल्लाहकार सत्या पहाडी नेपाली कम्युनिस्ट पार्टीको कला, साहित्य तथा संस्कृति विभागका इन्चार्ज गङ्गानारायण श्रेष्ठ, रक्तिम सांस्कृतिक अभियानका अध्यक्ष गिरीप्रसाद बुढा, राष्ट्रिय जनसांस्कृतिक महासङ्घका महासचिव आरसी न्यौपाने, नेपाली लेखक सङ्घका कार्यवाहक अध्यक्ष मनोज न्यौपाने, देवकोटा–लुसुन प्रज्ञा प्रतिष्ठानका अध्यक्ष सुनिल पौडेल लगाएतले राखेका थिए ।

त्यसैगरी कार्यक्रममा प्रलेसका पूर्व अध्यक्षहरू मातृका पोखरेल, प्रा. डा. जीवेन्द्र देव गिरी, डा. मधुसूदन गिरी, अखिल नेपाल जनसांस्कृतिक महासङ्घका महासचिव कुशल बोगटी तथा सल्लाहकारहरू ईश्वरचन्द्र ज्ञवाली, प्रा. डा. गोपिन्द्र पौडेल, गोपिरमण उपाध्याय, गोपाल बराललगायत उपत्यकाका प्रगतिशील स्रष्टाहरूको उल्लेख्य सहभागिता रहेको थियो ।

यसैबीच स्थापना दिवसको अवसरमा प्रलेसले आगामी वर्षभरि सञ्चालन गर्ने विभिन्न रचनात्मक र सङ्गठनात्मक निर्णयहरू समेत सार्वजनिक गरेको छ । त्यस्तै प्रलेसले सन् २०२६ (विक्रम संवत २०८३) का लागि प्रदान गरिने प्रतिष्ठित पुरस्कारहरूको घोषणा गरेको छ । जसमा श्यामप्रसाद स्मृति पुरस्कार, शक्ति लम्साल साहित्य पुरस्कार, प्रलेस प्रतिभा पुरस्कार, प्रलेस बालसाहित्य पुरस्कार र प्रलेस युवा पुरस्कार रहेका छन् । यी पुरस्कारहरू आगामी मङ्सिर ६ गते काठमाडौँमा आयोजना हुने विशेष कार्यक्रममा प्रदान गरिने प्रलेसले जनाएको छ ।

यस्तै हीरक वर्षमा प्रवेश गरेको उपलक्ष्यमा ७५ वर्ष नाघेका प्रगतिशील लेखक–साहित्यकारहरूलाई मङ्सिर ६ गते काठमाडौँमा अभिनन्दन समेत गरिने भएको छ । काठमाडौँ आउन असमर्थ स्रष्टाहरूलाई प्रदेशगत रूपमा वर्षभरि अभिनन्दन गरिनेछ भने हीरक वर्षकै अवसरमा प्रलेस हीरक वर्ष विशेषाङ्क प्रकाशन गरिने प्रलेसले जनाएको छ ।

स्मरण रहोस अखिल भारत जनवादी लेखक सङ्घको भारतमा मङ्सिरमा हुने कार्यक्रममा प्रलेसलाई निमन्त्रणा प्राप्त भएकाले संस्थाका तर्फबाट प्रतिनिधित्व जनाउने निर्णय गरिएको समेत उसले जनाएको छ । प्रलेसको गत बैशाखमा दोधारा चाँदनीमा भएको अन्तराष्ट्रिय साहित्य गोष्टीमा अखिल भारत जनवादी लेखक सङ्घका पदाधिकारीहरुको समेत सक्रिय सहभागिता रहेको थियो ।

000

https://www.sindhujwala.com  बाट साभार 

'राहुल सांकृत्यायन : साहित्य, दर्शन र समकालीन सान्दर्भिकता' विषयक परिचर्चा कार्यक्रम सम्पन्न

राहुल सांकृत्यायन केवल एक साहित्यकार वा इतिहासकार मात्र थिएनन्, उनी वैज्ञानिक चेतना, तर्कशीलता र सामाजिक रूपान्तरणका अनवरत अभियन्ता थिए। व्यक्तिगत जीवनमा सत्ता, प्रतिष्ठा र सुविधाका अनेक अवसर प्राप्त हुँदाहुँदै पनि उनले सम्झौतापरस्त र अवसरवादी राजनीतिलाई कहिल्यै स्वीकार गरेनन् । भारतीय राष्ट्रिय काङ्ग्रेससँग जोडिएका बेला पनि व्यक्तिगत लाभभन्दा समाज परिवर्तनको अभियानलाई प्राथमिकता दिए। उनको प्रसिद्ध कृति भागो नहीं, दुनियाँ को बदलो ले व्यक्त गरेको जस्तै उनी आफ्नो सम्पूर्ण जीवन समाज परिवर्तनको यात्रामै समर्पित रहे ।

करिब १३७ भन्दा बढी साहित्यिक, दार्शनिक, ऐतिहासिक तथा यात्रा-वृत्तान्तसम्बन्धी कृतिहरूमार्फत राहुलले भारतीय उपमहाद्वीप मात्र होइन, विश्व बौद्धिक जगतलाई महत्त्वपूर्ण वैचारिक सम्पदा दिएका छन् । यही बहुआयामिक व्यक्तित्वको साहित्य, दर्शन र समकालीन सान्दर्भिकतामाथि केन्द्रित हुँदै प्रगतिशील लेखक सङ्घ, नेपाल, वैचारिक विमर्श तथा परिसंवाद विभागले श्रावण १६ गते बागबजारस्थित केन्द्रीय कार्यालयमा 'विचार चौतारी'को ८८औं शृङ्खला सम्पन्न गरेको छ ।

'राहुल सांकृत्यायन : साहित्य, दर्शन र समकालीन सान्दर्भिकता' विषयक अन्तरक्रियामा प्रगतिवादी साहित्यकार ईश्वरचन्द्र ज्ञवाली, समालोचक मनोज भट्ट र अनुसन्धाता विधान आचार्यको मुख्य वक्ताको रूपमा सहभागिता थियो । कार्यक्रममा साहित्य, दर्शन र सामाजिक रूपान्तरणसँग सम्बन्धित विभिन्न व्यक्तित्वहरूको उल्लेखनीय सहभागिता रहेको थियो ।

समालोचक मनोज भट्टले राहुलको प्रसिद्ध कृति वोल्गा से गङ्गालाई ऐतिहासिक भौतिकवादी विश्व दृष्टिकोणको सशक्त साहित्यिक अभिव्यक्ति भएको बताए । उनका अनुसार करिब छ हजार वर्षअघिदेखि सन् १९४२ सम्मको मानव सभ्यताको इतिहासलाई कथात्मक शैलीमा प्रस्तुत गरिएको उक्त कृतिले इतिहासलाई वर्गीय दृष्टिकोणबाट बुझ्न महत्त्वपूर्ण आधार प्रदान गर्छ। उनले बुद्ध दर्शनका अनात्मवाद र क्षणिकवादजस्ता अवधारणाले द्वन्द्वात्मक भौतिकवादी चिन्तन विकासमा बौद्धिक आधार निर्माण गरेको उल्लेख गर्दै राहुल शास्त्रीय विद्वान मात्र नभई जनतासँग जोडिएका सक्रिय बुद्धिजीवी भएको धारणा व्यक्त गरे ।

कार्यक्रममा राहुलको दिमागी गुलामी कृतिमाथि पनि गहन विमर्श भयो। कथित राष्ट्रवाद, सामन्तवादी संस्कृति, अन्धविश्वास र व्यक्ति पूजामाथि प्रहार गर्ने यस कृतिको आजको डिजिटल युगमा झन् नयाँ अर्थ रहेको वक्ताहरूको निष्कर्ष थियो। सामाजिक सञ्जाल, एल्गोरिदम र सूचना-नियन्त्रणको विस्तारसँगै मानिसको चेतनामाथि नयाँ प्रकारको प्रभाव बढिरहेको वर्तमान अवस्थामा दिमागी गुलामी लाई कसरी पुनर्पाठ गर्ने भन्ने प्रश्नलाई कार्यक्रमले गम्भीर रूपमा उठाएको थियो ।

प्रगतिवादी साहित्यकार ईश्वरचन्द्र ज्ञवालीले वैज्ञानिक चेतनाको निर्माण आज झन् चुनौतीपूर्ण बनेको उल्लेख गर्दै धार्मिक ध्रुवीकरण, जातीय राजनीति र सामाजिक विभाजनका बिच प्रगतिशील साहित्यको भूमिका अझ सशक्त हुनुपर्ने बताए। उनले राहुलको भागो नहीं, दुनियाँ को बदलो को मूल सन्देश आज पनि उत्तिकै सान्दर्भिक रहेको धारणा राखे ।

राहुलका धर्मसम्बन्धी वैचारिक दृष्टिकोणमाथि पनि कार्यक्रममा चर्चा भयो। तुम्हारी क्षय मा उनले "मनुष्यता नभएको धर्मको क्षय हुनुपर्छ” भन्ने विचार प्रस्तुत गरेका छन् । त्यस्तै 'मेरी जीवन यात्रा' मा उनले मानिसको मुक्तिका लागि धर्मभन्दा विवेक, विज्ञान र मानवीय चेतनाको आवश्यकता रहेको तर्क गरेका छन् । अनुसन्धाता विधान आचार्यले राहुलका यी कृतिहरू आज पनि समाज परिवर्तनका लागि प्रेरणादायी रहेको उल्लेख गर्दै उनको साहित्यिक तथा वैचारिक यात्राबाट नयाँ पुस्ताले धेरै सिक्नुपर्ने बताए ।

कार्यक्रम प्रगतिशील लेखक सङ्घ, नेपालकी उपाध्यक्ष डा. अमृता शर्माको अध्यक्षतामा सम्पन्न भएको थियो भने विभागका संयोजक तथा उपाध्यक्ष समीर सिंहले सहजीकरण गरेका थिए । समापनका क्रममा विभागका सदस्य डा. कृष्ण सुवेदीले कार्यक्रमको समग्र सार प्रस्तुत गरेका थिए ।

विचार चौतारीको विशेषता मुख्य वक्ताहरूका प्रवचनमा मात्र सीमित नरही खुला वैचारिक बहसमा केन्द्रित रह्यो। पूर्व अध्यक्ष मातृका पोखरेल, डा. बालचन्द्र मिश्र, शेखर अर्याल, लोकबहादुर थापा, उषा तितिक्षु, अच्युत घिमिरे, राजाराम राउत, चिरिक शोभा तुलाधर, धनबहादुर मगर, वाशिष्ठ, राधा तिम्सिनालगायत सहभागीहरूले पूरक टिप्पणी गर्दै राहुल सांकृत्यायनको वैचारिक विरासतलाई समकालीन नेपाली समाजसँग जोडेर व्याख्या गरे। कार्यक्रममा सल्लाहकारहरू डा. मधुसूदन गिरी, प्रा. डा. गोपिन्द्र पौडेल, गोपाल बराल, सीता शर्मालगायतको पनि आतिथ्य रहेको थियो ।

वर्तमान समयमा राहल सांकृत्यायनका कृतिहरूले उठाएका प्रश्नहरू-वैज्ञानिक चेतना, अन्धविश्वासविरुद्धको सङ्घर्ष, सामाजिक समानता, आलोचनात्मक चिन्तन र परिवर्तनको राजनीति-अझै पनि उत्तिकै सान्दर्भिक छन् । 'विचार चौतारी-८८' ले राहुललाई स्मरण मात्र गरेन, उनको विचारलाई आजको डिजिटल, विभाजित र द्रुत परिवर्तनशील समाजमा पुनः पाठ गर्ने बहससमेत प्रारम्भ गरेको छ। यही अर्थमा यो कार्यक्रम केवल एउटा साहित्यिक गोष्ठी नभई वैज्ञानिक, लोकतान्त्रिक र प्रगतिशील चेतनाको निरन्तर यात्राप्रतिको प्रतिबद्धताको सार्वजनिक अभिव्यक्ति बनेको छ ।

राहुल सांकृत्यायनलाई सम्झनु केवल एक ऐतिहासिक व्यक्तित्वको सम्मान गर्नु मात्र होइन, वैज्ञानिक चेतना, आलोचनात्मक सोच र सामाजिक परिवर्तनको बहसलाई वर्तमान सन्दर्भमा पुनर्जीवित गर्नु पनि हो ।

यही कारण 'विचार चौतारी-८८' केवल एउटा नियमित साहित्यिक कार्यक्रम नभई वर्तमान समाजलाई विवेक, विज्ञान र परिवर्तनको दृष्टिबाट पुनः सोच्न आग्रह गर्ने वैचारिक हस्तक्षेपका रूपमा स्थापित भएको देखिन्छ ।

ooo

- समीर सिंहबाट प्रेषित समाचार समीक्षा

प्रलेसद्वारा राष्ट्रिय साहित्यिक गोष्ठी सम्पन्न

 

काठमाडौँ । प्रगतिशील लेखक सङ्घको आयोजनामा राष्ट्रिय साहित्यिक विचारगोष्ठी सम्पन्न भएको छ । पूर्व प्रधानमन्त्री तथा वरिष्ठ लेखक झलनाथ खनालको प्रमुख आतिथ्यमा २०८३ जेठ १० गते सुकेधारामा सो कार्यक्रम सम्पन्न भएको हो ।

उद्घाटन सत्र

बुढानीलकण्ठ नगरपालिकाको सहयोगमा अघि बढेको उक्त कार्यक्रमको पहिलो सेसनको उद्घाटन प्रमुख अतिथि खनालले आफ्नो ‘महाविष्फोट’ शीर्षकको कविता वाचन गरेर गर्नुभएको थियो ।

सो अवसरमा मन्तव्य राख्दै उहाँले कुनै पनि साहित्यलाई युगीन चरित्रको आधारमा बुझ्नुपर्ने धारणा राख्नुभयो ।

नेपालमा २०६२–६३ सालमा क्रान्ति नै भएको विचार व्यक्त गर्दै उहाँले भन्नुभयो– त्यतिखेर क्रान्ति भयो तर त्यो क्रान्ति कम्युनिस्ट पार्टीले गरेनन् । पुँजीवादी क्रान्ति भयो । त्यो नयाँ जनवादी क्रान्ति थिएन ।’

उहाँले अबको प्रगतिशील साहित्य सिर्जना गर्दा २०६२–६३ सालको परिवर्तनपछिको अवस्थालाई ख्याल गरिनुपर्ने बताउनुभयो ।

फरक प्रसङ्गमा उहाँले जेनजी आन्दोलनपछि अब राजनीतिक दलको नेतृत्वमा युवालाई समेट्नुपर्ने युगीन अवस्था आइपरेको विचार व्यक्त गर्नुभयो ।

त्यस्तै उहाँले प्रलेसजस्तो साझा सङ्गठनको महत्त्व अझै पनि यथावत् रहेको धारणा उहाँको थियो ।

श्यामप्रसादले २००९ सालमा स्थापना गरेको साझा वामपन्थी साहित्यकारको यो सङ्गठनलाई निरन्तरता दिइनुपर्ने आवश्यकतामा उहाँले जोड दिनुभयो ।

अध्यक्ष डा. देवी क्षेत्री दुलालको अध्यक्षता तथा महासचिव डा. पारस ढकालको सञ्चालनमा अगाडि बढेको सो कार्यक्रममा उपस्थित सहभागीलाई उपाध्यक्ष समीर सिंहले स्वागत गर्नुभएको थियो ।

राष्ट्रियगान वाचन तथा सहिदको सम्मानमा एक मिनट मौनधारणसँगै अघि बढेको सो कार्यक्रमलाई बुढानीलकण्ठ नगरपालिकाका शिक्षा शाखाका प्रमुख ललितविक्रम सिंह, विशिष्ट अतिथि कन्फ्युसियस सेन्टरका कोअर्डिनेटर क्यू वाङ मिङ, नेपाली लेखक सङ्घका कार्यवाहक अध्यक्ष मनोज न्यौपाने, राष्ट्रिय सहिद पार्कका अध्यक्ष सुदर्शन सिग्देल, नेपाल ललितकला प्रज्ञा–प्रतिष्ठानका पूर्व कुलपति केके कर्माचार्य, साहित्य सदनका अध्यक्ष हेमनाथ पौडेल, रक्तिम सांस्कृतिक अभियानका प्रकाश थापामगर र जनसांस्कृतिक महासङ्घका अध्यक्ष भीम कुमाखी मल्लले शुभकामना दिनुभएको थियो ।

गोष्ठी सत्र

कार्यक्रमको दोस्रो सत्र विचारगोष्ठीको रहेको थियो ।

कार्यक्रममा पहिलो कार्यपत्र प्रलेसका पूर्व अध्यक्ष मातृका पोखरेलको थियो । उहाँको कार्यपत्रको शीर्षक रहेको थियो– “प्रगतिशील साहित्यको वर्तमान अवस्था र भावी कार्यदिशा” । कार्यपत्रमाथि प्रगतिशील साहित्यकार सीता शर्माले टिप्पणी गर्नुभएको थियो ।

दोस्रो कार्यपत्र प्रा.डा. विदुर चालिसेको थियो । “बुढानीलकण्ठ नगरपालिका – प्रगतिशील साहित्य” शीर्षकको सो कार्यपत्रमाथि अर्की साहित्यकार नर्मदेश्वरी सत्यालले टिप्पणी गर्नुभएको थियो ।

कार्यक्रमाम हाउसबाट सुझाव सङ्कलन गरिएको थियो । त्यस क्रममा जगत् वाशिष्ठ, गोपालकुमार मैनाली, वासुदेव अधिकारी, डा. फणिन्द्र निरौला, सुधा मैनाली, माधव प्रधान, डम्बर पहाडी (एलाक), प्रवीन जोशी, लोकबहादुर थापा, प्राडा जीवेन्द्रदेव गिरी र कृष्ण धारावासीले पूरक जिज्ञासा राख्नुभएको थियो ।

जिज्ञासाको बारेमा कार्यपत्र प्रस्तोता पोखरेल र चालिसेले सङ्क्षिप्त स्पष्टीकरण दिनुभएको थियो ।

सामना सांस्कृतिक परिवारका आरोह नेपाली र जनसांस्कृतिक महासङ्घका उपाध्यक्ष नमुना शर्माले कार्यक्रममा गीत प्रस्तुत गर्नुभएको थियो ।

000

www.yugdarshan.com बाट साभार 

सुकुम्वासीको पक्षमा प्रलेसको देशव्यापी साहित्यिक प्रतिरोध

 

काठमाडौँ । सरकारले वास्तविक सुकुम्वासीको उचित व्यवस्थापन नगरी डोजर चलाएको विरोधमा प्रगतिशील लेखक सङ्घले देशव्यापी साहित्यिक प्रतिरोध गरेको छ ।

२०८३ जेठ ३ गते आइतबार प्रलेसले काठमाडौँसँगै साथै देशका विभिन्न स्थानमा कविता वाचन कार्यक्रमसँगै सो कार्यक्रम सम्पन्न भएको हो ।

काठमाडौँको शान्तिवाटिकामा सम्पन्न कार्यक्रममा उपत्यकाका विभिन्न प्रगतिशील स्रष्टाले कविता वाचन गर्नुभएको थियो । त्यसरी कविता वाचन गर्नेहरूमा विश्वनाथ तामाङ, कर्ण दयाल सोडारी, भक्त विश्वकर्मा, इन्दिरा अधिकारी, वैरागी जेठा, समष्टि बुढा, अम्बिका दाहाल, धनबहादुर मगर, मिसन अधिकारी, जीवनारायण खनाल, आरोह सी, नारायण शर्मा, धर्मेश पोखरेल, अनिलकिशोर घिमिरे, सुवास जिसी, भीष्म जोशी, हीरामणि दुखी, डा. कृष्ण सुवेदी, कुशल बोगटी, पारस ढकाल, डा. अमृता शर्मा, शोभा दुलाल, गोपाल बराल तथा नर्मदेश्वरी सत्याललगायत हुनुहुन्थ्यो ।

अन्तमा महासचिव पारस ढकालले धन्यवाद मन्तव्य तथा उपाध्यक्ष समीर सिंहले कविता वाचन गर्दै कार्यक्रमको समापन गर्नुभएको थियो ।

कार्यक्रममा सङ्घका केन्द्रीय सल्लाहकार तथा पूर्व अध्यक्ष मातृका पोखरेल तथा ईश्वरचन्द्र ज्ञवालीको पनि आतिथ्य रहेको थियो ।

यता, प्रलेस सुदूरपश्चिमले पनि भर्चुअल माध्यमबाट सुकुम्वासी बस्तीमाथि डोजर आतङ्कको विरोधमा कविता वाचन कार्यक्रम सम्पन्न गरेको छ ।

भर्चुअल माध्यमबाट आइतबार नै सम्पन्न सो कार्यक्रमको अध्यक्षता प्रलेस सुदूरपश्चिम अध्यक्ष कोपिला शर्मा ‘कल्प’ ले र सञ्चालन गणेश ढकालले गर्नुभएको थियो ।

सङ्घका सुदूरपश्चिम इन्चार्ज समीर सिंहको प्रमुख आतिथ्यमा सम्पन्न कार्यक्रमको विशिष्ट अतिथि उपाध्यक्ष डा. अमृता शर्मा हुनुहुन्थ्यो ।

त्यस्तै कर्णाली प्रदेशको जाजरकोट, कालिकोटलगायतका विभिन्न स्थानमा पनि कविता वाचन कार्यक्रम सम्पन्न भएको प्रलेसले जानकारी दिएको छ ।

000

www.yugdarshan.com बाट साभार 

राफ्टिङमा कविता !

 सुकुटेमा ‘कविता साँझ’

काठमाडौँ । 

प्रगतिशील लेखक सङ्घ, वैचारिक विमर्श तथा परिसंवाद विभागको आयोजनामा सिन्धुपाल्चोकको सुकुटेमा ‘कविता साँझ’ कार्यक्रम गरिएको छ। स्थानीय पर्यटन तथा प्रगतिशील साहित्यलाई समन्वय गर्ने गरि सम्पन्न कार्यक्रम २०८३ वैशाख १९ र २० कार्यक्रम गरिएको हो ।  

विभागको ८५ औँ ‘विचार चौतारी’ शृङ्खला अन्तर्गत भएको कार्यक्रमका प्रमुख अतिथि प्रलेसका पूर्व अध्यक्ष मातृका पोखरेल थिए। 

कार्यक्रममा विभिन्न कविले आआफ्ना रचना सुनाएका थिए। यसरी रचना प्रस्तुत गर्नेहरूमा प्रमुख अतिथि अतिथि प्रलेसका पूर्व अध्यक्ष मातृका पोखरेलसहित  ईश्वरचन्द्र ज्ञवाली, सुशीला प्रधानाङ्ग, बिन्दु शर्मा, गोपाल बराल, बाबा बस्नेत, कौशीला रिसाल, समीर सिंह, अमृता शर्मा, कृष्ण सुवेदी, नमुना शर्मा, दिनेश दुलाल, बालचन्द्र मिश्र, भोला ढकाल, कर्ण दयाल सोरारी, प्रतिभा पुन, पार्वती राउत, सुधा मैनाली, यदुनाथ बसन्तपुरे, भक्त विश्वकर्मा, विजेन्द्र विक्रम जि.सी., रमेश दाहाल, राधा कार्की, सुमन थापा ‘सङ्गम’, यादेवी ढकाल, सरस्वती शर्मा अधिकारी, वासुदेव पौड्याल, अच्युत घिमिरे, निर्मल बस्नेत, सुविन पन्त लगायत थिए। 

कार्यक्रममा सिन्धु सुकुटे पर्यटन व्यवसायी सङ्घका सचिव कृष्ण सापकोटा पनि सहभागि थिए।  
विभागका संयोजक सिंहको अध्यक्षता एवम् उपाध्यक्ष अमृता शर्माको सञ्चालनमा भएको कार्यक्रमका बारेमा कृष्ण सुवेदीले जानकारी गराएका थिए । 

कार्यक्रमको दोस्रो दिन ‘सुकुटे कविता बिहानी’ कार्यक्रममा कविका प्रगतिशील कविता वाचन गरिएको थियो। सोही दिन सुकटे बिच रिसोर्टबाट प्रारम्भ भएर सुनकोसी बिचसम्म राफ्टिङ समेत गरिएको थियो। राफ्टिङ अवधिमा समेत कविता वाचन गरिएको थियो ।

००० 

www.everestpedia.com बाट साभार